23/11/2023
ငွေရှာနည်း (၃) မျိုး
◾
ငွေရှာရတာနဲ့ပတ်သက်လို့ လူတစ်ယောက်နဲ့တစ်ယောက် မတူနိုင်ကြဘူး။ ဝင်ငွေပမာဏ မတူနိုင်ဘူး၊ ရှာတဲ့နည်းလမ်းမတူနိုင်ဘူး၊ လွယ်တာခက်တာ၊ ပင်ပန်းတာ၊ သက်သာတာ မတူနိုင်ကြဘူး။ ငွေရှာနည်းနဲ့ပတ်သက်ရင် အမျိုးမျိုးပြောကြပေမဲ့ ဘာကိုရင်းနှီးပြီးရှာသလဲအပေါ်မူတည်ပြီး အကြမ်းဖျင်းအားဖြင့် ၃ မျိုးခွဲခြားနိုင်တယ်။
ကာယအားကို ရင်းနှီးခြင်း
အခြေခံလက်လုပ်လက်စားတွေ၊ အထွေထွေလုပ်သားတွေ ငွေရှာတဲ့ပုံစံဖြစ်ပါတယ်။ ပညာအရည်အချင်း၊ ကျွမ်းကျင်မှု (Skill) အားနည်းတဲ့အခါ ကာယအားကိုသုံးပြီးရှာရပါတယ်။ ကာယအားဆိုတဲ့အတွက် ဘာကျွမ်းကျင်မှုမှမရှိလည်း အလုပ်လုပ်လို့ရတယ်ပေါ့။
ကူလီထမ်းတာကနေ စိုက်ပျိုးမွေးမြူရေး၊ စက်ရုံအလုပ်ရုံတွေမှာ ကျွမ်းကျင်မှုထွေထွေထူးထူးမလိုတဲ့အလုပ်တွေအထိ အခြေခံအကျဆုံး အလုပ်တွေ အကျုံးဝင်ပါတယ်။ ကိုယ်က ကာယအားစိုက်ထုတ်ရင် လုပ်အားခပြန်ရမယ်။ ကာယအားကိုရင်းနှီးပြီးရှာတာက ဝင်ငွေအနိမ့်ဆုံးအဆင့်ပဲရသလို ကိုယ်လုပ်နိုင်သရွေ့ပဲ ဝင်ငွေရနေမှာဖြစ်ပါတယ်။
ကျွမ်းကျင်မှုကို ရင်းနှီးခြင်း
ပရော်ဖက်ရှင်နယ်နယ်တွေ၊ ပညာရှင်တွေ ငွေရှာတဲ့ပုံစံဖြစ်ပါတယ်။ ကုမ္ပဏီတွေမှာလုပ်နေတဲ့ ကျွမ်းကျင်ဝန်ထမ်းကနေ ဆရာဝန်၊ အင်ဂျင်နီယာ၊ Web Developer၊ Designer၊ Public Speaker အထိ ကျွမ်းကျင်တဲ့ အသိပညာ၊ အတတ်ပညာတစ်ခုခုကိုအရင်းပြုပြီး အသက်မွေးဝမ်းကျောင်းအတွက်ရပ်တည်ကြတာဖြစ်ပါတယ်။
သူတို့ရဲ့ ဝင်ငွေက အထိုက်အသင့်ကောင်းတတ်ကြပေမဲ့ သူတို့လည်း အလုပ်လုပ်နေတဲ့အချိန်အတွက်ပဲ ဝင်ငွေရတတ်ကြပါတယ်။ အများအားဖြင့် အလုပ်ပြုတ်သွားရင် ဝင်ငွေလည်းရပ်သွားကြပါတယ်။ ခြွင်းချက်အနေနဲ့ ကိုယ့်ရဲ့ပညာကို အွန်လိုင်းပလက်ဖောင်းကနေ ပြန်လည်ဝေမျှတာ၊ စာအုပ်ထုတ်တာတွေလုပ်ရာကနေ Passive Income ပြန်ဝင်တာမျိုးတော့ရှိနိုင်ပါတယ်။
ငွေကြေးကို ရင်းနှီးခြင်း
စီးပွားရေးလုပ်ငန်းရှင်တွေ၊ ရင်းနှီးမြှုပ်နှံသူတွေရဲ့ ငွေရှာတဲ့နည်းလမ်းဖြစ်ပါတယ်။ သူတို့မှာလည်း ပညာနဲ့ အချိန်ရင်းနှီးရတာရှိနိုင်ပေမဲ့ ငွေကြေးရင်းနှီးမြှုပ်နှံတာက အဓိကဖြစ်ပါတယ်။ စီးပွားရေးလုပ်တယ်ဆိုရင် စစချင်းမှာ လုပ်ငန်းရှင် (Businessman) ကိုယ်တိုင် ထဲထဲဝင်ဝင်ပါတာဖြစ်နိုင်ပါတယ်။ အဲဒီကနေ လုပ်ငန်းကိုလည်ပတ်လုပ်ကိုင်နိုင်မယ့် Team တစ်ခုတည်ဆောက်ပြီး လုပ်ငန်းရှင်က ကိုယ်တိုင်မပါတော့တာ၊ ဒါမှမဟုတ် တစ်စိတ်တစ်ပိုင်းပဲပါဝင်တော့တာ ဖြစ်နိုင်ပါတယ်။
ရင်းနှီးမြုပ်နှံသူ (Investor) တွေကတော့ ပိုရှင်းတယ်။ Asset တစ်ခုခုမှာ ရင်းနှီးမြှုပ်နှံမယ်၊ အဲဒီကနေ Cash Flow ဒါမှမဟုတ် Capital Gain အနေနဲ့ Return တစ်ခုပြန်ရမယ်။ သူတို့အတွက် အဓိကအရင်းအနှီးက ငွေကြေးနဲ့ ရင်းနှီးမြှုပ်နှံမှုပညာပဲ။ စီးပွားရေးနဲ့ ရင်းနှီးမြှုပ်နှံမှုရဲ့ အဓိကအားသာချက်တစ်ခုကတော့ ကိုယ်က အလုပ်မလုပ်ဘဲနေလည်း ဝင်ငွေပုံမှန်ရှိနေနိုင်တာပဲ။
ကိုယ်တိုင်ကော ဘယ်နည်းလမ်းနဲ့ ငွေရှာရတာကြိုက်လဲ...။
To Owner
