06/02/2023
Sunk cost
دي فلوس اتصرفت خلاص و مش راجعة تاني
يعني لو أنت شاب و قررت تدخل في مشروع جواز بتبدأ ناس ترشحلك عرايس
و مع كل مقابلة بتروحها في علبة شيكولاته بتشتريها و بنزين او اوبر و هكذا و يا يحصل نصيب يا ميحصلش و في الحالتين الفلوس اللي اتصرفت دي مش هترجع تاني
و دا نفس اللي بيحصل معاك لما تبدأ في مشروع جديد و تصرف تسويق و مرتبات و تراخيص .... إلخ برضو الفلوس دي مش راجعة تاني
و زي ما بيحصل برضو في الجواز بيحصل في المشاريع تروح مقابلة و يحصل نصيب و خطوبة و مصاريف و خروجات و هدايا و بعدين تحس أن الموضوع مش مناسب و تبقى محتار تكمل عشان المصاريف و المجهود دا كل دا هيروح و هخسره و هرجع اعيده من تاني لو مكملتش و لا مكملش وكفاية خساير لحد كده أحسن ما اخسر كل حاجة بعد كده
نفس الكلام دا بيحصلنا لما نبدأ في مشروع و نقع في غرام الفكرة و المشروع يبقى بيخسر ومش ماشي كويس و منكونش قادرين نستغنى عنه وصعبان علينا الفلوس و الوقت و المجهود اللي حطناهم في المشروع
و هي دي Sunk cost fallacy
إننا نقرر منوقفش الخسارة عشان صعبان علينا الفلوس اللي صرفناها ف نصرف فلوس تانية كان ممكن نحطها في مشروع تاني ناجح نعوض بيه خسارتنا
و أخيراً لو أنت مهتم بالفلوس و كل حاجة بتأثر عليها متنساش
تعمل لايك و فولو على فيسبوك و لينكدان🤝
https://www.linkedin.com/in/monaggar
#الفلوس
05/02/2023
" Switching Cost "
و دي ببساطة حجم أو قيمة الخسارة اللي هيخسرها العميل لو سابك و راح للمنافس
عشان نوضح اكتر هحكيلك على موقف حصل معايا وممكن يكون حصل معاك أنت كمان
كنت لسه ناقل مكان جديد و عايز أشترك في خدمة إنترنت و عشان للأسف مستوى الخدمة من نفس الشركة بيتغير من مكان للتاني ف كان لازم أخوض التجربة كأني أول مرة أشترك و
من حسن الحظ ال ٤ شركات كانوا جمب بعض
شركة A: هتدفع تمن الراوتر قسط كل شهر ٥ جنية مع الفاتورة انا : طب لو حبيت أوقف الاشتراك معاكوا؟!
شركة A: مفيش مشكلة بس تيجي تدفع باقي تمن الراوتر كاش و هتستنى ١٤ يوم عشان تقدر تشترك مع شركة تانية.
طبعا دي تكلفة عالية خصوصا إني لما أشترك مع شركة تانية مضطر أشتري راوتر تاني خاص بيهم و مدة طويلة لو أنت بتعتمد على الانترنت بشكل كبير في حياتك ف دخلت على الشركة اللي بعدها نفس الكلام
و اللي بعدها برضو كان يعتبر نفس الكلام باختلاف أن التحويل من شركتهم لشركة تانية بيتم بحد أقصى أسبوع.
اخر شركة قالي هتدفع برضو ٥ جنيه كل شهر بس عادي لو وقفت الاشتراك و تمن الراوتر لسه مخلصش يعتبر اللي دفعته إيجار و بناخد الراوتر اما لو الاقساط غطت إجمالي تمن الراوتر خلاص بقى بتاعك و كمان التحويل من شركتهم لشركة تانية بيتم بحد أقصى أسبوع زي تالت شركة
لو أنت مكاني كعميل و لسه مش واثق في مستوى الخدمة اللي هتاخده و مش عايز تتحمل تكلفة كبيرة لو مطلعتش الخدمة بالشكل المطلوب هتختار أنهي شركة فيهم أنا اخترت الشركة الرابعة لأني لسه معرفش مستوى الخدمة بتاعتها في المنطقة وهيبقى سهل عليها اغيرها لو معجبتنيش.
تكلفة الراوتر و المدة اللي هعيشها من غير إنترنت عشان أقدر أغير من شركة للتانية هي دي ال Switching Cost اللي هيدفعها العميل بتاعك عشان يسيبك و يروح للمنافسين وكل ما زادت التكلفة دي كل ما كان صعب على العميل أنه يسيبك و كل ما كان تأثيره على تسعيرك و جودة منتجك أقل.
أخيرا لو أنت مهتم بالفلوس و كل حاجة بتأثر عليها متنساش
تعمل لايك و فولو على فيسبوك و لينكدان🤝
https://www.linkedin.com/in/monaggar
#الفلوس
03/02/2023
دا شكل هاني رمزي بعد ما عرف أن المورد ممكن يبقى هو المتحكم في سعر و جودة المنتج و بعدها أقوله أن العميل ممكن هو كمان يبقى المتحكم في سعر و جودة المنتج أو الخدمة
" Bargaining Power of Buyers "
✓ لو أنت ناوي تبيع منتج كل منافسينك بتبيعه هو هو بالظبط من غير أي إختلاف في المواصفات أو في طريقة تقديمه ف مش قدامك غير أنك تتميز بالسعر الأقل أو بالجودة الأعلى ساعتها يبقى العميل هو اللي متحكم في سعر و جودة المنتج.
✓✓ لو أنت ناوي تدخل سوق عدد العملاء فيه قليل مقارنة بعدد مقدمي الخدمة أو المنتج يبقى العميل هو برضو المتحكم في سعر و جودة المنتج.
✓✓✓ لو المنتج أو الخدمة اللي بتقدمها ليها بدايل يبقى العميل هو برضو المتحكم في سعر و جودة المنتج أو الخدمة.
✓✓✓✓ لو أنت ناوي تبيع منتج مكمل لمنتج نهائي و منتجك ينفع يستبدل بمنتج تاني من غير ما المنتج النهائي يتأثر يبقى العميل هو برضو المتحكم في سعر و جودة المنتج.
أخيراً لو أنت مهتم بالفلوس و كل حاجة بتأثر عليها متنساش
تعمل لايك و فولو على فيسبوك و لينكدان🤝
https://www.linkedin.com/in/monaggar
#الفلوس
01/02/2023
المعلم بلائسي ال Bargaining Power of Suppliers الذي عرفته السينما المصرية 🥷
في المشهد دا من فيلم سلام يا صاحبي المعلم بلائسي كان كل يوم بيغير في سعر البطيخ و التجار تتحايل عليه ياخدوا بسعر امبارح و يشتكوا أنهم مش عارفين يشتغلوا و طبعا كانوا في الأخر بيشتروا بالسعر اللي يقول عليه عشان كدة و أنت بتفكر تدخل صناعة جديدة عليك واحد من أهم العوامل اللي بتأثر على قرارك هو عدد الموردين لمدخلات الإنتاج ( المواد الخام / الخامات) في الصناعة دي
محتاج تدور و تعرف هل المادة الخام اللي أنت محتاجها عشان تصنع أو تقدم منتجك تقدر تشتريها من أكتر من مورد ولا مش موجوة غير عند مورد واحد هو بس اللي بيبيع المادة الخام دي ؟!
طب ليه دي معلومة مهمة جداً و تفرق في قرار دخولك الصناعة دي من عدمه لأن لو فيه مورد واحد بس بيسيطر على المادة الخام اللي تصنع المنتج متوقف عليها ف دا معناه
أن تسعير المنتج مش في أيدك دا في أيد المورد لأن هو المتحكم في سعر المادة الخام و بالتالي هو المتحكم في هامش الربح بتاعك
و مش بس كدة دا معناه كمان أنك معندكش تحكم في سلاسل الإمداد و التوريد بتاعتك لأن مواعيد و كميات التوريد في أيد المورد و بالتالي لو أتأخر في ميعاد التوريد أو وردلك كمية أقل من اللي أنت محتاجها دا معناه إن الطاقة و الدورة الإنتاجية بتاعتك تأثرت و بالتالي التوزيع أتأثر فتأثر زمن وصول المنتج للعميل بتاعك ف تلاقي نفس في الأخر خسران فرص بيعية
عشان كده مهم أوي تدرس موردينك المحتملين
و لو الخام ليه أكتر من مورد لازم تنوع مصادر التوريد بحيث تقسم احتياجاتك على ٢ أو ٣ موردين ٨٠٪ مع المورد الأساسي عشان تبني معاه علاقات و تستفيد بالسعر الأقل مع حجم الطلب و ١٠٪ لكل مورد عشان تبنى معاهم علاقات لقدام لو حصل حاجة مع المورد الأساسي يشيلوك و كمان المورد الأساسي يبقى عارف أنك بتتعامل مع غيره ف ميعليش عليك السعر
أخيراً لو أنت مهتم بالفلوس و كل حاجة بتأثر عليها متنساش
تعمل لايك و فولو على فيسبوك و لينكدان🤝
https://www.linkedin.com/in/monaggar
#الفلوس
