Raed El-Juhainy - رائد الجهيني

أنواع الشركات الهادفة للربح حسب الشكل القانوني
يُعد هذا التقسيم من أكثر التصنيفات انتشارًا في القوانين العربية، مع ملاحظة أن التفاصيل قد تختلف من دولة لأخرى حسب نظام الشركات فيها.
أولًا: المنشآت الفردية
لا تُعتبر شركة بالمعنى القانوني لعدم وجود أكثر من شريك، بل هي نشاط تجاري يملكه ويديره شخص واحد.
المؤسسة الفردية:
المالك: شخص طبيعي واحد
المسؤولية: غير محدودة (أموال المالك الشخصية مسؤولة عن التزامات المشروع)
لا تمتلك شخصية اعتبارية مستقلة
غالبًا تنتهي بوفاة المالك إلا إذا وُجد نص قانوني بخلاف ذلك
ثانيًا: شركات الأشخاص
تعتمد بشكل أساسي على الثقة والعلاقة الشخصية بين الشركاء.
1- شركة التضامن:
جميع الشركاء مسؤولون بالتضامن
المسؤولية غير محدودة وشخصية
لا يمكن التنازل عن الحصة إلا بموافقة باقي الشركاء
2- شركة التوصية البسيطة: تنقسم إلى نوعين من الشركاء:
شركاء متضامنون: يديرون الشركة ومسؤوليتهم غير محدودة
شركاء موصون: يساهمون بالمال فقط ومسؤوليتهم في حدود حصصهم
3- شركة المحاصة:
لا تمتلك شخصية اعتبارية مستقلة
لا تُسجل في السجل التجاري
آثارها القانونية تقتصر على الشركاء فقط
غالبًا تُنشأ لمشروع معين أو مدة محددة
ثالثًا: شركات الأموال
تعتمد على رأس المال أكثر من الأشخاص، ولها شخصية قانونية مستقلة عن الملاك، مع مسؤولية محدودة للمساهمين.
1- شركة المساهمة العامة:
تطرح أسهمها للاكتتاب العام
يمكن تداول أسهمها في البورصة
رأس المال مقسم إلى أسهم متساوية
تستمر بغض النظر عن تغيير المساهمين
2- شركة المساهمة المغلقة:
لا تطرح أسهمها للجمهور
ملكيتها تقتصر على عدد محدود من المستثمرين
تخضع لنفس قواعد شركات المساهمة دون الاكتتاب العام
3- شركة التوصية بالأسهم:
شركاء متضامنون: مسؤوليتهم غير محدودة ويتولون الإدارة
مساهمون: مسؤوليتهم محدودة وقصر دورهم على التمويل والرقابة
تجمع بين خصائص شركات الأشخاص وشركات الأموال
رابعًا: الشركة ذات المسؤولية المحدودة
تُصنف غالبًا ضمن شركات الأموال، لكنها تعتبر شكلًا وسطًا بين شركات الأشخاص والأموال.
المسؤولية: محدودة بقدر الحصة
رأس المال: مقسم إلى حصص وليس أسهم متداولة
لا تطرح للاكتتاب العام
لها شخصية اعتبارية مستقلة
تستمر حتى مع وفاة أو خروج أحد الشركاء (إلا إذا نص العقد على غير ذلك)
خامسًا: شركة الشخص الواحد
شكل قانوني حديث مشتق من الشركة ذات المسؤولية المحدودة.
يمكن أن يملكها شخص طبيعي أو اعتباري
المسؤولية محدودة في حدود رأس المال
تجمع بين الإدارة الفردية والحماية القانونية للمسؤولية المحدودة
وفي النهاية، يظل المرجع الأساسي هو قانون الشركات في كل دولة، لأنه قد يضيف أو يغيّر بعض التفاصيل التنظيمية.

6 مبادئ لازم تكون أساس شغلك:

مبدأ قياس التكلفة: تسجيل التكاليف بناءً على قيمتها الفعلية والموثقة بالمستندات (لا مكان للافتراضات).
مبدأ المقابلة (Matching): تحميل كل فترة مالية بمصاريفها المرتبطة بإيراداتها، عشان تعرف الربح الحقيقي لكل منتج.
مبدأ التكلفة والمنفعة: نظام التكاليف اللي بتصممه لازم يوفر لك معلومات توفر فلوس أكتر من تكلفة تشغيل النظام نفسه.
مبدأ الموضوعية: البيانات لازم تكون قابلة للتحقق من أي طرف خارجي، بعيداً عن التقدير الشخصي.
مبدأ الاستمرارية: توزيع التكاليف الثابتة والإهلاكات بيتم على أساس أن المشروع مستمر وليس للتصفية.
مبدأ الوحدة المحاسبية: فصل تكاليف النشاط تماماً عن أي مصاريف شخصية للملاك.

أي نظام محاسبي منظم بيمر بمجموعة مراحل مترابطة، بتبدأ من لحظة حدوث العملية المالية وتنتهي بإعداد القوائم المالية وإقفال الحسابات. المراحل دي بتُعرف باسم الدورة المحاسبية، وبتتم بالشكل ده:
1- تحديد وتحليل العمليات المالية
في البداية بنحدد العمليات اللي حصلت فعلاً، ونراجع المستندات المرتبطة بيها زي الفواتير والإيصالات، ونتأكد من دقتها قبل ما يتم تسجيلها.
2- التسجيل في دفتر اليومية
بعد كده بنسجل كل عملية في دفتر اليومية في صورة قيد محاسبي، مع توضيح الطرف المدين والطرف الدائن، وبترتيب زمني.
3- الترحيل إلى دفتر الأستاذ
ثم يتم نقل القيود إلى حسابات الأستاذ، بحيث كل حساب يجمع العمليات الخاصة بيه ويظهر رصيده بشكل واضح.
4- إعداد ميزان المراجعة الأولي
بنجهز ميزان مراجعة مبدئي للتأكد إن مجموع الأرصدة المدينة بيساوي مجموع الأرصدة الدائنة.
5- إجراء التسويات الجردية
في نهاية الفترة، بنعمل قيود تسوية لبعض الحسابات علشان تعكس الإيرادات والمصروفات بشكل دقيق حسب مبدأ الاستحقاق.
6- إعداد ميزان المراجعة بعد التسويات
بعد تسجيل التسويات، بنعمل ميزان مراجعة جديد للتأكد إن الحسابات ما زالت متوازنة.
7- إعداد القوائم المالية
في المرحلة دي بنعد القوائم المالية اللي بتوضح نتيجة النشاط والمركز المالي للمنشأة.
8- إقفال الحسابات
أخيرًا، بنقفل الحسابات المؤقتة زي الإيرادات والمصروفات، استعدادًا لبدء فترة مالية جديدة.
ببساطة، دي هي الخطوات الأساسية اللي بيمشي عليها أي نظام محاسبي علشان يطلع معلومات مالية دقيقة ومنظمة.

فيه خلط شائع بين مصطلحين مهمين في المحاسبة: الدورة المستندية والدورة المحاسبية
والحقيقة إن العلاقة بينهم مش اختيار… دي علاقة تكامل، وأي خلل في واحدة بيأثر بشكل مباشر على التانية
خلينا نبسطهم بشكل واضح .
أولاً: الدورة المستندية
هي ببساطة حركة المستندات داخل الشركة
يعني المستند بيبدأ منين، يمر على مين، مين يعتمد عليه، لحد ما يوصل للمحاسب
هدفها الأساسي هو الرقابة والتنظيم
علشان نضمن إن مفيش فلوس بتتصرف أو بضاعة بتتحرك بدون مستند رسمي واعتماد واضح
بتحدد المسؤوليات والصلاحيات داخل كل خطوة
وكمان تعتبر جزء أساسي من نظام الرقابة الداخلية، وأي ضعف فيها ممكن يفتح باب للأخطاء أو التلاعب
مثال مبسط (في المشتريات):
طلب شراء → عروض أسعار → أمر شراء → إذن استلام → فاتورة المورد → طلب صرف → إذن صرف أو شيك
وطبعًا دي مجرد دورة واحدة، لأن أي شركة بيكون فيها أكتر من دورة زي:
المبيعات، المخازن، الخزينة، الأصول الثابتة، الرواتب… وغيرها
النقطة المهمة:
الدورة المستندية بتيجي قبل المحاسبة
ومفيش قيد محاسبي سليم من غير مستند صحيح
لكن برضه… وجود مستند مش معناه إن المعالجة المحاسبية صح
لازم المحاسب يفهم طبيعة العملية ويحللها
ثانيًا: الدورة المحاسبية
دي المرحلة اللي بيتم فيها تحويل المستندات لأرقام
بتبدأ أول ما المحاسب يستلم المستندات ويحولها لقيود يومية
هدفها هو تسجيل وتلخيص العمليات المالية
علشان نطلع قوائم مالية تساعدنا نفهم أداء الشركة ونقرر صح
خطواتها الأساسية:
تحليل العملية → قيد يومية → ترحيل للأستاذ → ميزان مراجعة → تسويات → ميزان نهائي → قوائم مالية → قيود إقفال
هي ببساطة النظام اللي بيحوّل المستندات لمعلومات مالية مفيدة
وبرضه مهمة جدًا:
توقيت التسجيل مش دايمًا وقت المستند، لكن حسب مبدأ الاستحقاق
يعني بنسجل لما الحدث يحصل، مش لما الفلوس تتحرك
وفيه قيود مفيش لها مستند خارجي
زي الإهلاك أو المخصصات أو المصروفات المستحقة
الخلاصة:
لو الدورة المستندية فيها مشكلة
هتدخل بيانات غلط للمحاسبة… وبالتالي القوائم المالية هتكون مضللة
ولو المستندات مظبوطة لكن المحاسبة ضعيفة
يبقى عندك ورق كتير… بس مفيش معلومات مفيدة
الشغل الصح بيكون في الربط القوي بين الاتنين
حتى مع وجود أنظمة حديثة زي الـ ERP اللي بتربطهم بشكل تلقائي
برضه الفهم والتحليل يفضلوا الأساس في شغل المحاسب

المحاسبة تُعد لغة عالم الأعمال التي تعبّر بها الشركات عن أوضاعها ونتائجها
والمحاسب هو المترجم المسؤول الذي ينقل هذه اللغة للآخرين بشكل واضح وصادق
لذلك، إذا لم يكن المحاسب مُلمًّا بقواعد هذه اللغة، فمن الطبيعي أن تكون الترجمة غير دقيقة، وقد تعطي صورة مشوشة أو مضللة عن حقيقة وضع الشركة

لو عايز تفهم الشركة بجد…
بص على الكاش
مش الربح…
علشان كده
أهم قائمة فعلًا:
قائمة التدفقات النقدية

هي الوحيدة اللي بتقولك:
الفلوس دخلت منين… وراحت فين

القائمة بتنقسم لـ 3 أجزاء

1) الأنشطة التشغيلية (Operating)

ده قلب البزنس الحقيقي

هنا بتعرف:
هل النشاط الأساسي بيولد كاش؟ ولا لأ

بنحسبها غالبًا بالطريقة غير المباشرة:

نبدأ بـ صافي الربح
ونعمل عليه تعديلات

نضيف المصاريف غير النقدية
(زي الإهلاك والمخصصات)
→ لأنها قللت الربح بس مفيش كاش خرج

نعدّل التغيرات في رأس المال العامل:

• زيادة الأصول (مخزون / عملاء) → (-) كاش
• نقص الأصول → (+) كاش

• زيادة الالتزامات (موردين) → (+) كاش
• نقص الالتزامات → (-) كاش

نستبعد البنود غير التشغيلية:
• نطرح الأرباح
• نضيف الخسائر

نطرح الضرائب المدفوعة فعليًا

الناتج = الكاش الحقيقي من التشغيل

2) الأنشطة الاستثمارية (Investing)

هنا بتشوف الشركة بتعمل إيه في أصولها

• شراء أصول → خروج كاش (-)
• بيع أصول → دخول كاش (+)

غالبًا بيكون سالب في الشركات اللي بتتوسع

3) الأنشطة التمويلية (Financing)

هنا بتفهم الشركة بتموّل نفسها إزاي 👇

• قروض / زيادة رأس مال → (+) كاش
• سداد قروض / توزيعات → (-) كاش

الصورة الكاملة

تشغيلي

+ استثماري
+ تمويلي

= صافي التغير في الكاش

+ رصيد أول المدة
= رصيد آخر المدة (لازم يطابق

الخلاصة:

قائمة الدخل تقولك:
كسبت ولا لأ

لكن التدفقات النقدية تقولك:
فلوسك فين فعلًا 👌

ممكن شركة تكسب…
وتقع بسبب حاجة واحدة بس

مش الخسارة
لكن “إدارة السيولة”

اسمها:
Working Capital

ببساطة:
الفرق بين
اللي داخل قريب…
واللي لازم يتدفع قريب

المشكلة إن:
الربح ممكن يستحمل تأخير
لكن الكاش… لأ

تشوفها إزاي؟

• بتبيع كتير .. أرباح شكلها حلو
• بس التحصيل بطيء.. كاش قليل

• بتشتري مخزون زيادة .. فلوس متربطة
• الموردين عايزين فلوسهم .. ضغط

• التزامات قصيرة الأجل .. لازم تتدفع
• مفيش سيولة كفاية .. أزمة

وهنا بيبان الفرق

بين شركة “ناجحة على الورق”
وشركة “عارفة تعيش”

الخلاصة:

إدارة البزنس مش بس تزود الربح
لكن تظبط التوقيت بين الداخل والخارج

بص يا محاسب…
خليني أقولك حاجة هتفرق معاك جدًا في الفهم
الإيرادات والمصروفات مش بتتحرك لوحدها…
هي دايمًا بتأثر على حقوق الملكية
والأثر ده بيبان عندك في الأصول أو الالتزامات
طيب إزاي؟
خلينا نبدأ بالمصروفات
أي مصروف بتدفعه، بيعمل واحد من تلاتة:
يا إما يقلل فلوسك
يا إما يزوّد اللي عليك
يا إما الاتنين مع بعض
مثال: فاتورة صيانة بـ 1800 جنيه
دفعتهم كاش → الفلوس قلت
مدفعتش لسه → بقى عليك 1800
دفعت 1000 والباقي 800 →
الفلوس قلت + عليك جزء لسه
في كل الحالات النتيجة واحدة
حقوق الملكية قلت… لأنك صرفت
طيب الإيرادات بقى
أي إيراد بيعمل العكس تمامًا:
يا إما يزوّد فلوسك
يا إما يقلل اللي عليك
يا إما الاتنين
مثال: قدمت خدمة بـ 6500 جنيه
قبضت كاش → فلوسك زادت
العميل كان دافع مقدم → التزام عليك قل
كان دافع 2500 وقبضت 4000 →
فلوسك زادت + الالتزام قل
وفي كل الحالات
حقوق الملكية زادت… لأنك كسبت
الخلاصة بقى اللي تهمك
الإيراد والمصروف بيغيروا حقوق الملكية
لكن…
الأصول والالتزامات بيحكوا لك القصةالفلوس اتحركت إزاي؟
جات منين؟ وراحت فين؟
لو استوعبت الجزئية دي…
هتبدأ تفهم المحاسبة بشكل أعمق بكتير .

لما نيجي نسعّر أي منتج في المحاسبة، لازم الأول نفهم حاجة مهمة جدًا:
الطاقة الإنتاجية للشركة.
وعندنا في المحاسبة كذا نوع من الطاقة، وخلينا نشرحها بمثال بسيط:
تخيل عندك مطعم بيصنع ساندوتشات برجر 🍔
1. الطاقة النظرية (Maximum Theoretical Capacity)
دي أعلى طاقة ممكنة على الورق، لو الماكينات شغالة 24 ساعة بدون توقف نهائي، ومفيش أي صيانة أو راحة أو أعطال.
مثال:
الماكينة تقدر تنتج 120 ساندوتش في اليوم لو شغالة طول الوقت بدون أي توقف.
بس ده طبعًا مستحيل يحصل في الواقع.
2. الطاقة المتاحة (Practical Capacity)
دي الطاقة بعد ما نخصم وقت الصيانة، والتنظيف، وفترات الراحة.
مثال:
بعد ما نحسب وقت الصيانة والراحة، نلاقي إن الإنتاج الواقعي الممكن هو 90 ساندوتش في اليوم.
3. الطاقة العادية (Normal Capacity)
ودي أهم واحدة في التسعير، لأنها بتمثل المتوسط الطبيعي للطلب عبر فترة طويلة.
مثال:
في الظروف العادية، الورشة بتبيع حوالي 70 ساندوتش في اليوم كمتوسط ثابت.
4. الطاقة الفعلية (Actual Capacity)
ودي اللي حصلت فعلاً في يوم معين.
مثال:
في يوم كان فيه عزوف من العملاء، تم إنتاج وبيع 50 ساندوتش فقط.
* نستخدم أنهي طاقة في التسعير؟
في المحاسبة، بنعتمد على الطاقة العادية (Normal Capacity) عند تحميل التكاليف على المنتج.
مثال بالأرقام:
لو عندك إيجار الورشة 700 جنيه في اليوم:
✔ على الطاقة العادية (70 ساندوتش):
نصيب الساندوتش من الإيجار = 10 جنيه
❌ لو استخدمنا الطاقة النظرية (120 ساندوتش):
النصيب هيبقى حوالي 5.8 جنيه
وده رقم مضلل لأن مفيش منشأة بتشتغل بكفاءة 100% طول الوقت.
* لو استخدمنا الطاقة الفعلية (50 ساندوتش):
النصيب هيبقى 14 جنيه
وده هيخلي سعر المنتج عالي بشكل غير منطقي ويخلي الشركة تظهر كأنها غير كفؤة.
* الخلاصة:
المحاسبة بتقول إن تحميل التكاليف لازم يكون على الطاقة الطبيعية لأنها تعكس الواقع على مدى طويل، مش يوم كويس أو يوم وحش.
والفرق بين الطاقة الفعلية والطبيعية بيتسجل كـ تكلفة طاقة عاطلة وتتحمل على قائمة الدخل، مش على المنتج

المخصص في المحاسبة فكرته بسيطة جدًا: بنطبق مبدأ الحيطة والحذر. بدل ما نستنى الخسارة أو الالتزام يحصل ويفاجئنا، بنستعد له من دلوقتي عن طريق إننا نقتطع جزء من أرباح الفترة الحالية ونحتفظ بيه لمواجهة اللي جاي.
وده مش معناه إن فيه فلوس اتدفعت فعليًا، لكنه تقدير محاسبي بنحجزه علشان نغطي خسارة محتملة أو التزام متوقع، إحنا عارفين إنه ممكن يحصل لكن مش محددين قيمته بدقة ولا توقيته.
بالتالي، المخصص بيساعد إن القوائم المالية تعكس صورة واقعية، ويحافظ على استقرار المركز المالي للشركة بدل ما يتأثر فجأة بأي خسائر.
أمثلة على المخصصات:
مخصص ديون مشكوك في تحصيلها: لما تبيع بالأجل وفي احتمال إن بعض العملاء مايسددوش، فبتحسب نسبة وتكون مخصص من بدري.
مخصص هبوط أسعار البضاعة: لو قيمة البضاعة في السوق قلت عن تكلفتها، بنعمل مخصص بالفرق عشان ما نبالغش في تقييم المخزون.
مخصص قضايا: لو فيه دعوى على الشركة واحتمال تخسرها، بنقدّر التعويض المتوقع ونكون له مخصص.
مخصص مكافأة نهاية الخدمة: حق الموظفين بيتحسب تدريجيًا، فبنكوّن مخصص سنوي يغطي الالتزام ده وقت استحقاقه.
باختصار، المخصص بيخلي الأرباح أقرب للحقيقة، ويجهّز الشركة لأي التزامات أو خسائر متوقعة بدون مفاجآت.

أنت فاهمها بالعكس…
مش لازم تبقى جاهز عشان تبدأ
ابدأ الأول… والجاهزية هتيجي في الطريق
كل تجربة بتعلمك
وكل مرة بتخليك أقوى من اللي قبلها
• أول مرة: هتحسها تقيلة
• تاني مرة: هتكون أسهل شوية
• مع التكرار: هتبقى طبيعي جدًا
المشكلة مش في الصعوبة…
المشكلة إنك لسه مبدأتش